Faslon Ko Takalluf Hai Humse Agar Naat Lyrics | Iqbal Azeem

ہم بھی بے بس نہیں

(جناب اقبال عظیم)

ہم مدینے میں تنہا نکل جائیں گے

اور گلیوں میں قصداً بھٹک جائیں گے

ہم وہاں جا کے واپس نہیں آئیں گے

ڈھونڈتے ڈھونڈتے لوگ تھک جائیں گے

فاصلوں کو تکلف ہے ہم سے اگر

ہم بھی بے بس نہیں بے سہارا نہیں

خود انہیں کو پکاریں گے ہم دُور سے

راستے میں اگر پاؤں تھک جائیں گے

جیسے ہی سبز گنبد نظر آئے گا

بندگی کا قرینہ بدل جائے گا

سر جھکانے کی فرصت ملے گی کسے

خود ہی آنکھوں سے سجدے ٹپک جائیں گے

نام ان کا جہاں بھی لیا جائے گا

ذکر ان کا جہاں بھی کیا جائے گا

نور ہی نور سینوں میں بھر جائے گا

ساری محفل میں جلوے لپک جائیں گے

اے مدینے کے زائر خدا کے لئے

داستانِ سفر مجھ کو یوں مت سنا

دل تڑپ جائے گا بات بڑھ جائے گی

میرے محتاط آنسو چھلک جائیں گے

ان کی چشمِ کرم کو ہے اس کی خبر

کس مسافر کو ہے کتنا شوقِ سفر

ہم کو اقبال جب بھی اجازت ملی

ہم بھی آقا کے دربار تک جائیں گے