اے رب میرے پروردگار | سید ناظر حسین گل چاندپوری کی خوبصورت حمد
اے رب میرے پروردگار
اے میرے معبود برحق اے میرے پروردگار
تیری عظمت کے تصدق تیری رحمت کے نثار
تو ہی ہے دانا و بینا کارسازِ روزگار
میری حالت جو بھی ہے وہ سب ہے تجھ پر آشکار
رحم کن بر حالِ زارم از طفیلِ مصطفیٰ
اے قدیرِ کل شیئِ حاکمِ ارض و سماء
تو اگر چاہے تو ذرے کو بنا دے آفتاب
تو جو چاہے تو سمندر کو مٹا دے در حباب
تو تو ہے محبوب' تیرا ہر کرشمہ بے حجاب
انتہا تیری عنایت کہ نہ بخشش کا حساب
رحم کن بر حالِ زارم از طفیلِ مصطفیٰ
اے قدیرِ کل شیئِ حاکمِ ارض و سماء
تیری ہیبت سے لرزتے ہیں زمین و آسماں
تیری عظمت پر ہیں ساجد کل ملائک انس و جاں
ذرہ ذرہ سے تری تخلیق ہوتی ہے عیاں
اے سمیع اے علیم، اے رحیم و مہرباں
رحم کن بر حالِ زارم از طفیلِ مصطفیٰ
اے قدیرِ کل شیئِ حاکمِ ارض و سماء
تیرے اک ادنیٰ اشارے سے بنی کل کائنات
"کُن" کہا تو نے مکمل ہوگئی ہر ایک بات
تو ہے لاثانی تو ہے بے مثل' تیری کل صفات
برتر و بالا و اعلیٰ ہے الہیٰ تیری ذات
رحم کن بر حالِ زارم از طفیلِ مصطفیٰ
اے قدیرِ کل شیئِ حاکمِ ارض و سماء
تیرے جلوؤں سے ہیں روشن انجم و شمس و قمر
ہے تجلی سے تری بزمِ دو عالم جلوہ گر
مالکِ کون و مکاں اے خالقِ جن و بشر
ابتدائے جانے نہ تیری انتہا کوئی مگر
رحم کن بر حالِ زارم از طفیلِ مصطفیٰ
اے قدیرِ کل شیئِ حاکمِ ارض و سماء
دستِ قدرت میں ہے تیرے سارے عالم کا نظام
ہے شہنشاہی تجھی کو زیب' سب تیرے غلام
آس تکتے ہیں تیرا ہی بگڑے کوئی کام
بے کس و ناشاد ہوں مجھ کو بھی کردے شادکام
رحم کن بر حالِ زارم از طفیلِ مصطفیٰ
اے قدیرِ کل شیئِ حاکمِ ارض و سماء
تیرے ممکن کو نہ کوئی غیر ممکن کرسکے
غیر ممکن جس کو کردے' کون اسے ممکن کرے
عاجز و محکوم ہیں دونوں جہاں آگے ترے
ملتجی ہے گل بھی اے غفار بخشش کے لیے
رحم کن بر حالِ زارم از طفیلِ مصطفیٰ
اے قدیرِ کل شیئِ حاکمِ ارض و سماء
(سید ناظر حسین ابنِ منظر گل چاندپوری)
