تری شان جل جلالہ | سید فرید احمد وفا مراد آبادی کی مشہور حمد
تری شان جل جلالہ
مرا سچا رب ہے کریم تو
تری شان جل جلالہ
تری حمدِ عم نوالہ
تری شان جل جلالہ
کہیں غنچہ بن کے چٹک گیا
کہیں پھول بن کے مہک گیا
ہے ہر ایک رنگ میں تو ہی تو
تری شان جل جلالہ
ہے چمن میں رنگِ ترا عیاں
ترا نور غنچوں میں ہے نہاں
تو بسا ہے پھولوں میں بن کے بو
تیری شان جل جلالہ
تو جلیل ہے، تو کبیر ہے
ترا کون مثل و نظیر ہے
کہ نظیر اپنا ہے آپ تو
تری شان جل جلالہ
تو سمیع ہے، تو بصیر ہے
تو علیم ہے، تو خبیر ہے
ہے نہاں عیاں ترے رو برو
تری شان جل جلالہ
نہ زمین تھی یہ نہ تھا آسماں
کئے "کُن" کے کہتے ہی دو جہاں
ترا غلغلہ ہے یہ چار سُو
تری شان جل جلالہ
تو ہے روزِ حشر کا بادشاہ
ہے گناہ سے حال مرا تباہ
ترے ہاتھ ہے مری آبرو
تری شان جل جلالہ
میں ترا وہ طالبِ دید ہوں
تری راہ میں جو شہید ہوں
یہ ٹپک ٹپک کے کہے لہو
تری شان جل جلالہ
تری سب سے اعلیٰ ہے عزّ و شاں
کہ تو ہی ہے مالکِ دو جہاں
ہے وفا کے لب پہ یہ گفتگو
تری شان جل جلالہ
(سید فرید احمد وفا مراد آبادی)
