جب زبان پر محمد کا نام آ گیا - مکمل کلام مولانا شاہ محمد احمد
جب زبان پر محمد ﷺ کا نام آ گیا
جب زبان پر محمد ﷺ کا نام آ گیا
دوستو! زندگی کا پیام آ گیا
آ گیا انبیاء کا امام آ گیا
لے کے فیضانِ دارالسلام آ گیا
تیرے در پر جو خیرالانام آ گیا
اس کے ہاتھوں میں عرفاں کا جام آ گیا
ساز و سامانِ عیشِ دوام آ گیا
یعنی حکمِ سجود و قیام آ گیا
اللہ اللہ ہوئی دل کی دنیا حسیں
جب مقدر سے حسنِ تمام آ گیا
پا گیا پا گیا حاصلِ زندگی
در پہ آقا ﷺ کے جس دم غلام آ گیا
دور ظلمت ہوئی دل منور ہوا
جب مدینے میں ماہِ تمام آ گیا
ان کی مرضی نظر آئی رشکِ جناں
عشق میں ایک ایسا مقام آ گیا
لائے تشریف جب سید المرسلین ﷺ
خلدِ دنیا بنی وہ نظام آ گیا
ظلم رخصت ہوا عدل قائم ہوا
عشق کے ہاتھ میں انتظام آ گیا
تیرے ابرِ کرم سے شہِ انبیاء
ہو کے سیراب ہر تشنہ کام آ گیا
فیضِ ساقیِ کونین صلِّ علیٰ
جو بھی چاہے پئے اذنِ عام آ گیا
تیری برکت سے اے سید الانس و جاں
صبح روشن ہوئی کیفِ شام آ گیا
آپ ﷺ کی مدح انسان کیا کر سکے
عرش سے جب درود و سلام آ گیا
قلب شاداں ہوا روح رقصاں ہوئی
لب پہ احمد کا شیریں کلام آ گیا
(مولانا شاہ محمد احمد)
